धाराशिव : दरवर्षीप्रमाणे यंदाही धाराशिव शहरात शिवजयंती महोत्सव मोठ्या उत्साहात आणि दिमाखात साजरा केला जात आहे. अवघ्या महाराष्ट्राचे लक्ष वेधून घेणारी धाराशिवची शिवजयंती ही केवळ उत्सव न राहता श्रद्धा, इतिहास आणि संस्कृतीचा संगम ठरत आहे. यामुळे राज्यभरातून शिवभक्तांमध्ये या महोत्सवाबाबत विशेष उत्सुकता पाहायला मिळत आहे.
यंदाच्या शिवजयंती महोत्सवाची संकल्पना ‘शिवशंभू’ अशी ठेवण्यात आली असून, शहरातील छत्रपती शिवाजी महाराज चौकातील पुतळ्याभोवती भगवान शंकराची भव्य मूर्ती साकारण्यात आली आहे. छत्रपती शिवाजी महाराजांचे शौर्य, धर्मनिष्ठा आणि शिवशंभूशी असलेले आध्यात्मिक नाते या संकल्पनेतून प्रभावीपणे मांडण्यात आले आहे. या संपूर्ण सजावटीसाठी आकर्षक प्रकाशयोजना, कलात्मक रचना आणि देखणारी मांडणी करण्यात आली असून, रात्रीच्या वेळी ही सजावट अधिकच मन मोहून टाकणारी ठरत आहे.
या भव्य मांडणीमुळे नागरिकांसह बाहेरगावाहून आलेल्या शिवभक्तांचीही मोठी गर्दी होत आहे. अनेकजण कुटुंबासह या ठिकाणी भेट देत असून फोटो, व्हिडीओद्वारे हा देखावा सोशल मीडियावर मोठ्या प्रमाणात शेअर केला जात आहे.
शिवजयंती महोत्सवाच्या निमित्ताने शहरात सलग आठवडाभर विविध सामाजिक, सांस्कृतिक व प्रबोधनात्मक उपक्रमांचे आयोजन करण्यात आले आहे. या विविध कार्यक्रमांमुळे संपूर्ण शहर शिवमय झाल्याचे चित्र दिसत आहे.
एकूणच, धाराशिवची शिवजयंती ही प्रत्येक शिवभक्तासाठी मनाची पर्वणी ठरत असून, छत्रपती शिवाजी महाराज यांच्या विचारांना उजाळा देणारा हा महोत्सव राज्यभरात कौतुकाचा विषय बनला आहे.
