धाराशिव, दि. 3 जून : राज्यातील अभियांत्रिकी प्रवेश प्रक्रिया लवकरच सुरू होणार असून विद्यार्थी व पालकांना केंद्रीभूत प्रवेश प्रक्रिया (CAP) संदर्भात मार्गदर्शन मिळावे यासाठी महाराष्ट्र राज्य सामायिक प्रवेश परीक्षा (सीईटी) कक्ष, मुंबई यांच्या वतीने विभागीय सुसंवाद कार्यक्रमाचे आयोजन करण्यात आले आहे. हा कार्यक्रम शुक्रवार, दि. 5 जून 2026 रोजी सकाळी 11 ते दुपारी 2 या वेळेत तेरणा अभियांत्रिकी महाविद्यालय, धाराशिव येथे होणार आहे.
सीईटी परीक्षा दिलेल्या आणि अभियांत्रिकीच्या विविध शाखांमध्ये प्रवेश घेण्यास इच्छुक असलेल्या विद्यार्थ्यांना या कार्यक्रमामध्ये सीईटी कक्षातील तज्ज्ञांकडून सविस्तर मार्गदर्शन करण्यात येणार आहे. प्रवेश प्रक्रियेदरम्यान विद्यार्थी व पालकांच्या मनात निर्माण होणाऱ्या विविध शंका, आवश्यक कागदपत्रे, प्रवेशासाठी आवश्यक पात्रता, ऑनलाईन नोंदणी प्रक्रिया तसेच कॅप फेऱ्यांबाबतची माहिती यावेळी दिली जाणार आहे.
विद्यार्थी आणि पालकांच्या प्रवेश प्रक्रियेसंदर्भातील सर्व शंकांचे निरसन करण्याच्या उद्देशाने या कार्यक्रमाचे आयोजन करण्यात आले असल्याची माहिती तेरणा अभियांत्रिकी महाविद्यालयाचे प्राचार्य डॉ. विक्रमसिंह माने यांनी दिली.
या सुसंवाद कार्यक्रमाचा धाराशिव शहर व परिसरातील जास्तीत जास्त विद्यार्थी आणि पालकांनी लाभ घ्यावा, असे आवाहन महाराष्ट्र राज्य सामायिक प्रवेश परीक्षा (सीईटी) कक्ष, मुंबई तसेच तेरणा अभियांत्रिकी महाविद्यालयाचे प्राचार्य डॉ. विक्रमसिंह माने यांनी केले आहे.
