धाराशिव : धाराशिव-उजनी महामार्गावर बेंबळी गावाजवळ बुधवार (ता. ९ एप्रिल) रोजी दुपारी झालेल्या अपघातात दोन जण जखमी झाले. या अपघातात MH 12 KN 8508 क्रमांकाची पांढऱ्या रंगाची स्विफ्ट कार मोठ्या प्रमाणात नुकसानग्रस्त झाली आहे.
मिळालेल्या माहितीनुसार, दुपारच्या वेळी रस्त्यावरुन कार वेगाने जात असताना अचानक एक कुत्रा मध्ये आल्याने चालकाचे वाहनावरील नियंत्रण सुटले. परिणामी कार रस्त्याच्या कडेला जाऊन जोरात आदळली, अशी माहिती प्रत्यक्षदर्शींनी दिली.
या अपघातात कारमधील दोघांना किरकोळ ते मध्यम स्वरूपाच्या दुखापती झाल्या असून त्यांना तातडीने जवळच्या रुग्णालयात उपचारासाठी दाखल करण्यात आले. सुदैवाने या घटनेत कोणतीही जीवितहानी झालेली नाही.
दरम्यान, धाराशिव-उजनी महामार्ग सुरू झाल्यापासून या मार्गावर अपघातांच्या घटना वाढताना दिसत आहेत. स्थानिक नागरिकांकडून रस्त्याच्या दर्जाबाबत नाराजी व्यक्त केली जात असून काही ठिकाणी रस्ता उंच-खोल झाल्याने (बाउंसिंग) अपघाताचा धोका वाढत असल्याच्या तक्रारी समोर येत आहेत.
यासंदर्भात संबंधित प्रशासनाने तातडीने दखल घेऊन रस्त्याची दुरुस्ती करावी आणि महामार्गावर अधिक सुरक्षा उपाययोजना राबवाव्यात, अशी मागणी नागरिकांकडून करण्यात येत आहे.
