धाराशिव : नगरपरिषद निवडणुकीत भाजपला प्रचंड मोठे यश मिळाले होते. भाजपचा नगराध्यक्ष तसेच २२ नगरसेवक निवडून आले आहेत. आता काँग्रेसच्या २ सदस्यांनी देखील पक्षाला सोडचिठ्ठी देत भारतीय जनता पार्टीत प्रवेश केला आहे. मुंबई येथील भाजप कार्यालयात मंत्री जयकुमार गोरे आणि आमदार राणाजगजितसिंह पाटील यांच्या प्रमुख उपस्थितीत हा पक्षप्रवेश पार पडला.
काँग्रेसच्या मागासवर्गीय सेलचे जिल्हाध्यक्ष तथा नगरसेवक सिद्धार्थ बनसोडे आणि नगरसेवक अक्षय जोगदंड यांनी भारतीय जनता पार्टीत प्रवेश केला आहे. राज्याचे ग्रामविकास मंत्री जयकुमार गोरे आणि आमदार राणाजगजितसिंह पाटील यांच्या प्रमुख उपस्थितीत पक्षप्रवेश पार पडला.
धाराशिव नगरपालिका निवडणुकीत काँग्रेसचे तीन नगरसेवक निवडून आले होते. मात्र आता या तिघांपैकी दोन नगरसेवकांनी भारतीय जनता पार्टीत प्रवेश केला आहे. काँग्रेस पक्षाला हा मोठा धक्का बसला असून याचे पडसाद धाराशिवच्या राजकारणात येत्या काळात पाहायला मिळणार आहेत.
यावेळी धारशिवचे उपनगराध्यक्ष अक्षय ढोबळे, भाजपचे गटनेते अमित शिंदे, नगरसेवक राहुल काकडे, अभिजित पतंगे हे देखील उपस्थित होते.
