जॉगिंग ट्रॅक, पथदिवे आणि इमारतींच्या नूतनीकरणासाठी ५ कोटींचा निधी मंजूर
धाराशिव : धाराशिव आणि तुळजापूर शहरांच्या सर्वांगीण विकासाला चालना देण्याच्या अनुषंगाने राज्य शासनाने महत्त्वपूर्ण निर्णय घेतला आहे. महाराष्ट्र शासनाच्या नगरविकास विभागाने सन २०२६-२७ या आर्थिक वर्षासाठी ‘वैशिष्ट्यपूर्ण’ योजनेअंतर्गत दोन्ही नगरपरिषदांसाठी एकूण ५ कोटी रुपयांचा निधी मंजूर केला आहे. यामध्ये धाराशिव नगरपरिषदेसाठी ३ कोटी रुपये, तर तुळजापूर नगरपरिषदेसाठी २ कोटी रुपयांचा समावेश आहे. याबाबतचा शासन निर्णय गुरुवारी (दि. ५) जारी करण्यात आला असून या निधीतून दोन्ही शहरांमध्ये विविध नागरी सुविधांची कामे करण्यात येणार आहेत.
धाराशिवमध्ये ३ कोटींतून जॉगिंग ट्रॅक आणि पथदिवे
धाराशिव नगरपरिषद क्षेत्रातील जिल्हा न्यायालय ते श्री बसवेश्वर चौक या रस्त्याच्या बाजूला जॉगिंग ट्रॅक विकसित करणे आणि आवश्यक ठिकाणी पथदिवे बसविण्यासाठी ३ कोटी रुपयांचा निधी मंजूर करण्यात आला आहे. या प्रकल्पामुळे शहरातील नागरिकांना सकाळी आणि सायंकाळी चालण्यासाठी तसेच नियमित व्यायामासाठी चांगली सुविधा उपलब्ध होणार आहे. विशेषतः ज्येष्ठ नागरिक, महिला आणि आरोग्याबाबत जागरूक असलेल्या नागरिकांसाठी हा जॉगिंग ट्रॅक उपयुक्त ठरणार आहे.
त्याचबरोबर रस्त्यालगत पथदिवे बसविण्यात येणार असल्याने परिसरातील प्रकाशव्यवस्थेत सुधारणा होणार आहे. नागरिकांच्या सुरक्षिततेच्या दृष्टीनेही ही सुविधा महत्त्वपूर्ण ठरणार असून परिसराच्या सौंदर्यीकरणालाही चालना मिळणार आहे.
तुळजापुरात २ कोटींची विविध विकासकामे
तुळजापूर नगरपरिषद क्षेत्रातील विविध विकासकामांसाठी २ कोटी रुपयांचा निधी मंजूर करण्यात आला आहे. यामध्ये तुळजापूर नगरपरिषद इमारतीच्या नूतनीकरणासाठी १ कोटी रुपये, तर संत सेना नाभिक समाज मंदिराच्या नूतनीकरणासाठी १० लाख रुपयांची तरतूद करण्यात आली आहे. याशिवाय शहरातील विविध प्रभागांमध्ये आवश्यकतेनुसार नवीन पथदिवे बसविण्यासाठी ९० लाख रुपयांचा निधी मंजूर करण्यात आला आहे.
या कामांमुळे तुळजापूर शहरातील विविध भागांमध्ये प्रकाशव्यवस्था अधिक सक्षम होणार असून नागरिकांच्या दैनंदिन सुविधांमध्ये सुधारणा होण्यास मदत होणार आहे. नगरपरिषद इमारतीच्या नूतनीकरणामुळे प्रशासकीय कामकाजासाठी आवश्यक पायाभूत सुविधांनाही बळकटी मिळणार आहे.
या निधी मंजुरीबाबत आमदार राणाजगजितसिंह पाटील यांनी मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा अजित पवार यांचे आभार मानले आहेत.
