पुणे : महानगरपालिका निवडणुकीच्या तोंडावर दोन्ही राष्ट्रवादी काँग्रेस एकत्र निवडणुक लढवणार असल्याच्या चर्चा काही दिवसांपासून सुरु आहेत. याबाबत दोन्ही पक्षातील महत्वाच्या नेत्यांच्या बैठका देखील सुरु असल्या तरी अधिकृत घोषणा मात्र झालेली नाहीये. चर्चा आणि बैठकांमध्ये अडकलेली ही युती फिस्कटण्याची शक्यता आता वर्तवली जात आहे.
पुणे महानगरपालिका निवडणुकीसाठी दोन्ही राष्ट्रवादी काँग्रेस एकत्र येणार असल्याची चर्चा आणि तशा घडामोडी गेल्या काही दिवसांत पाहायला मिळत आहेत. राष्ट्रवादी काँग्रेस शरद पवार गटाचे नेते अंकुश काकडे, वंदना चव्हाण यांच्यासह अजित पवार गटाचे सुभाष जगताप आणि इतर महत्वाच्या नेत्यांसोबत चर्चा सुरु होती. मात्र दोन्ही पक्षाच्या उमेदवारांनी घड्याळ चिन्हावर निवडणुक लढवावी या मुद्द्यावर तसेच जागा वाटपासंदर्भात एकमत होत नसल्याची माहिती समोर येत आहे.
त्यातच शनिवारी सकाळी राज्याचे उपमुख्यमंत्री आणि राष्ट्रवादी पक्षाचे प्रमुख अजित दादा पवार नॉट रिचेबल झाल्याच्या बातम्या माध्यमांमध्ये येण्यास सुरुवात झाली. त्यामुळे दोन्ही पक्षांमधील एकत्र येण्यावरुन निर्माण झालेला पेच अद्याप सुटला नसल्याचं बोललं जात आहे. पुढच्या काही दिवसांमध्ये मात्र दोन्ही राष्ट्रवादी काँग्रेस पक्ष एकत्र लढणार की एकमेकांच्या विरोधात लढणार, हे स्पष्ट होईल.
