धाराशिव : तेरणा अभियांत्रिकी महाविद्यालय, धाराशिव, इन्फोसिस आणि डीटीई महाराष्ट्र यांच्या संयुक्त विद्यमाने दरवर्षी बी.टेक. विद्यार्थ्यांसाठी इंटर्नशिप कार्यक्रम आयोजित केला जातो. यंदा ऑगस्ट २०२५ ते मे २०२६ या कालावधीत महाविद्यालयातील २९ विद्यार्थ्यांनी इन्फोसिस या जागतिक ख्यातीच्या आयटी कंपनीमध्ये इंटर्नशिप यशस्वीरीत्या पूर्ण करून महत्त्वपूर्ण औद्योगिक अनुभव संपादन केला.
या इंटर्नशिपदरम्यान विद्यार्थ्यांना कंपनीतील अनुभवी अभियंते, व्यवस्थापक आणि तज्ज्ञांसोबत प्रत्यक्ष प्रकल्पांवर काम करण्याची संधी मिळाली. उद्योगक्षेत्रात आवश्यक असलेले ज्ञान, आधुनिक तंत्रज्ञान आणि व्यावहारिक विचारसरणी विकसित करण्यासाठी अशा इंटर्नशिपचा मोठा फायदा होतो.
विद्यार्थ्यांनी विविध सामाजिक व तांत्रिक समस्यांवर आधारित प्रकल्पांमध्ये सहभाग घेतला. पाण्याच्या गुणवत्तेची चाचणी, ऑटोनॉमस सिस्टिम्स, कृत्रिम बुद्धिमत्तेच्या साहाय्याने तेल पाइपलाइन गळती शोधणे, शहरी भागासाठी राइड-शेअरिंग अॅप विकसित करणे, तसेच हॉटेल आणि दुकानांच्या नफा विश्लेषणासाठी नेटलीक्स अॅनालायझर अशा विविध प्रकल्पांवर त्यांनी काम केले.
इंटर्नशिपसाठी विद्यार्थ्यांची निवड कंपनीने निर्धारित केलेले अभ्यासक्रम पूर्ण केल्यानंतर करण्यात आली. इंटर्नशिप कालावधीत दररोज सॉफ्टवेअर प्रकल्पांच्या प्रगतीचा आढावा कंपनीच्या मेंटॉरसोबत घेतला जात होता. इलेक्ट्रॉनिक्स अँड टेलिकम्युनिकेशन, आर्टिफिशियल इंटेलिजन्स अँड डेटा सायन्स तसेच कॉम्प्युटर सायन्स अँड इंजिनिअरिंग विभागातील विद्यार्थ्यांनी या उपक्रमात सहभाग नोंदविला.
क्लाउड कम्प्युटिंग, पायथॉन प्रोग्रामिंग, आर्टिफिशियल इंटेलिजन्स, फुल-स्टॅक डेव्हलपमेंट, जावा टेक स्टॅक, डेटा व्हिज्युअलायझेशन आणि प्रोजेक्ट मॅनेजमेंट यांसारख्या उद्योगक्षेत्रात मागणी असलेल्या तंत्रज्ञानांवर विद्यार्थ्यांनी प्रत्यक्ष काम केले. यामुळे भविष्यातील प्लेसमेंट आणि दर्जेदार प्रकल्पांच्या संधींसाठी त्यांना मोठी मदत होणार आहे.
इलेक्ट्रॉनिक्स अँड टेलिकम्युनिकेशन विभागातील ओंकार लकडे, भूमिका इंगळे, वैष्णवी पाटील, संगणक विभागातील रोहिणी पांढरे, संध्याराणी पवार, साक्षी शिंदे, स्नेहा बुरगुटे, अंजली जकाते, अल्सफा अरब, प्रताप बोंदर तसेच आर्टिफिशियल इंटेलिजन्स विभागातील निकिता जगताप, तेजल ससाणे, विशाखा चंदने, राजनंदिनी शिंदे, अनिशा अंबुरे, संजीवनी शेळके, सलोनी सुरडकर, सुमित ढेंगळे, श्रावणी सूर्यवंशी, अदिती घोगरे, साक्षी सलगरे, साक्षी गोटे, समृद्धी मसलगे, राजनंदिनी मोकाशी, अंजली खारगे, सुजित सूर्यवंशी, मानिनी ढाकरे, अर्पिता मुळे आणि सानिया मुल्ला यांनी ही इंटर्नशिप पूर्ण केली. नवीन तंत्रज्ञान शिकण्याची संधी मिळाल्याबद्दल विद्यार्थ्यांनी समाधान व्यक्त केले.
महाविद्यालयाचे इन्फोसिस एसपीओसी म्हणून प्रा. अनिरुद्ध देशपांडे यांनी समन्वयकाची भूमिका पार पाडली. कौशल्याधारित उपक्रमांमध्ये विद्यार्थ्यांनी अधिकाधिक सहभाग घेतल्यास यश निश्चित मिळते, असा विश्वास त्यांनी व्यक्त केला.
