धाराशिव : जागतिक महिला दिनानिमित्त ८ मार्च रोजी येथील नगरपरिषदेत महिला व बालकल्याण सभापती वैशाली सुशांत सोनवणे यांच्या अध्यक्षतेखाली महिला दिनाचा कार्यक्रम पार पडला. शहरातील नगरपरिषद स्वच्छता विभागातील महिला कर्मचारी तसेच अंगणवाडी मदतनीस यांचा शाल व पुष्पगुच्छ देऊन सन्मान करण्यात आला. समाजाच्या प्रगतीत महिलांचे योगदान महत्त्वाचे असून त्यांच्या कार्याचा गौरव करणे ही काळाची गरज असल्याचे मत यावेळी मान्यवरांनी व्यक्त केले.
नगरपरिषदेच्या महिला व बालकल्याण विभागामार्फत या कार्यक्रमाचे आयोजन करण्यात आले होते. कार्यक्रमाच्या निमित्ताने पर्यावरण संवर्धनाचा संदेश देत उपस्थित महिलांना कुंडी सहित झाडांचे वाटप करण्यात आले. नगराध्यक्षा नेहा राहुल काकडे, महिला व बालकल्याण सभापती वैशाली सोनवणे, उपसभापती दीपा धनंजय पाटील यांच्या प्रमुख उपस्थितीत हा कार्यक्रम पार पडला.
यावेळी नगरसेविका वैशाली रवी मुंडे, गायत्री दंडनाईक, अर्चना शिंगाडे, आकांक्षा वाघमारे, उजमासबा पठाण, रूपाली आंबेकर, शकुंतला देवकते, अलका पारवे, राणी दाजी पवार, संगीता अकुजकर, वंदना पवार तसेच जिल्हा परिषदेच्या माजी अध्यक्षा अस्मिता कांबळे, आहारतज्ज्ञ कल्पना सोनवणे आणि डेप्युटी डीन स्मिता गवळी यांच्या हस्ते महिलांना रोपांचे वाटप करण्यात आले.
या कार्यक्रमात नगरपरिषद स्वच्छता विभागातील महिला कर्मचारी व अंगणवाडी मदतनीस यांनी मोठ्या संख्येने सहभाग नोंदवला. आभार प्रदर्शन महिला व बालकल्याण अधीक्षक वैशाली आव्हाड यांनी केले. कार्यक्रम यशस्वी करण्यासाठी नगरपरिषद कर्मचारी विकास माने, स्वराज जानराव तसेच कर्मचारी वर्ग, महिला शिक्षक, महिला मुख्याध्यापक व इतर महिला कर्मचारी मोठ्या संख्येने उपस्थित होत्या. महिला दिनानिमित्त आयोजित या कार्यक्रमामुळे महिलांच्या कार्याचा गौरव होत त्यांना प्रोत्साहन मिळाल्याची भावना उपस्थित महिलांनी व्यक्त केली.
