आतापर्यंत जिल्ह्यात ४९,७९४ शेतकऱ्यांच्या खात्यावर ४५७ कोटी जमा
धाराशिव : कर्जाच्या ओझ्याखाली असलेल्या धाराशिव जिल्ह्यातील शेतकऱ्यांना ऐन सणासुदीच्या काळात मोठा आर्थिक दिलासा मिळाला आहे. ‘पुण्यश्लोक अहिल्यादेवी होळकर शेतकरी कर्जमुक्ती योजना-२०२६’ अंतर्गत १ ऑक्टोबर रोजी जिल्ह्यातील १५ हजार ७८७ पात्र शेतकऱ्यांच्या कर्जखात्यावर तब्बल १६७ कोटी ४६ लाख रुपये जमा करण्यात आले आहेत.
राज्यभरात या टप्प्यात ३ लाख २७ हजार पात्र शेतकऱ्यांच्या खात्यावर सुमारे ३ हजार १६० कोटी ४४ लाख रुपये जमा करण्यात आले. त्यामध्ये धाराशिव जिल्ह्याला १६७ कोटी ४६ लाख रुपयांचा लाभ मिळाला आहे.
‘पुण्यश्लोक अहिल्यादेवी होळकर शेतकरी कर्जमुक्ती योजना-२०२६’ला २ जून २०२६ रोजी राज्य मंत्रिमंडळाने मान्यता दिली होती. त्यानंतर १५ जुलैच्या शासन निर्णयाद्वारे योजनेच्या काही निकषांमध्ये अंशतः सुधारणा करण्यात आली.
योजनेतील कर्जमुक्ती आणि एकवेळ समझोता (OTS) या घटकांच्या अंमलबजावणीसाठी राज्यातील ३० जिल्हा मध्यवर्ती सहकारी बँका, १२ राष्ट्रीयीकृत बँका आणि अन्य खासगी बँका अशा एकूण ५३ बँकांनी सुमारे ३२ लाख कर्जखात्यांची माहिती महा-आयटीने विकसित केलेल्या पोर्टलवर अपलोड केली आहे. यामध्ये धाराशिव जिल्ह्यातील ९७ हजार ८७३ पात्र लाभार्थी शेतकऱ्यांचा समावेश आहे.
जिल्ह्यात ५५ हजारांहून अधिक शेतकऱ्यांचे आधार प्रमाणीकरण
योजनेच्या निकषांनुसार जिल्ह्यातील सुमारे ६७ हजार ६१९ थकबाकीदार शेतकऱ्यांची यादी आधार प्रमाणीकरणासाठी प्रसिद्ध करण्यात आली आहे. त्यापैकी ५५ हजार ३६३ शेतकऱ्यांनी आधार प्रमाणीकरण पूर्ण केले आहे.
३० सप्टेंबरअखेर राज्यातील सुमारे १५ लाख ८६ हजार पात्र शेतकऱ्यांच्या कर्जखात्यात १३ हजार २७६ कोटी रुपये थेट जमा करण्यात आले आहेत. त्यामध्ये धाराशिव जिल्ह्यातील ४९ हजार ७९४ शेतकऱ्यांच्या कर्जखात्यात ४५७ कोटी १८ लाख रुपये जमा झाले आहेत. यापैकी धाराशिव जिल्हा मध्यवर्ती सहकारी बँकेच्या ४ हजार ७ शेतकऱ्यांना २५ कोटी ८३ लाख रुपयांचा लाभ मिळाला आहे.
कर्जमुक्तीनंतर नव्या पीक कर्जाचा मार्ग मोकळा
कर्जमुक्तीचा लाभ मिळालेल्या शेतकऱ्यांना नव्या हंगामासाठी पुन्हा आर्थिक पाठबळ मिळावे, यासाठी लाभार्थी शेतकऱ्यांना तातडीने पीक कर्ज वाटप करण्याचे निर्देश शासनाने सर्व बँकांना दिले आहेत. त्यामुळे कर्जमुक्तीबरोबरच संबंधित शेतकऱ्यांसाठी नव्या पीक कर्जाचा मार्गही मोकळा होणार आहे.
उर्वरित शेतकऱ्यांनी आधार प्रमाणीकरण करावे
प्रसिद्ध झालेल्या याद्यांमध्ये नाव असलेल्या, मात्र अद्याप आधार प्रमाणीकरण न केलेल्या शेतकऱ्यांनी ही प्रक्रिया तातडीने पूर्ण करावी, असे आवाहन जिल्हा प्रशासनाने केले आहे. आधार प्रमाणीकरण पूर्ण झाल्यानंतर पात्र शेतकऱ्यांच्या कर्जखात्यावर शासनाकडून लाभाची रक्कम जमा केली जाणार आहे.
उर्वरित पात्र शेतकऱ्यांची तिसरी यादीही शासनाकडून लवकरच प्रसिद्ध करण्यात येणार आहे. त्यामुळे अद्याप यादीत नाव न आलेल्या पात्र शेतकऱ्यांनाही पुढील टप्प्यात कर्जमुक्तीचा लाभ मिळणार आहे.
