आमदार राणाजगजितसिंह पाटील यांच्या आवाहनाला जिल्हाभरातून प्रतिसाद
किराणा साहित्य, फराळ किटचे वाटप तर कुठे पशुधनासाठी पाणवठे
धाराशिव : जिल्ह्यातील अभूतपूर्व दुष्काळी परिस्थितीचे गांभीर्य ध्यानात घेऊन आमदार राणाजगजितसिंह पाटील यांनी यंदाचा वाढदिवस साधेपणाने साजरा करण्याचे आवाहन केले होते. अनावश्यक खर्च टाळून गरजू कुटुंबांना मदत करावी, संकटात असलेल्या बांधवांच्या चेहऱ्यावर हसू फुलवावे, अशी त्यांची अपेक्षा होती. त्यांच्या या आवाहनाला जिल्हाभरातील पदाधिकारी, कार्यकर्ते आणि हितचिंतकांनी उत्स्फूर्त प्रतिसाद दिला. गुरुवारी दिवसभर वाढदिवसानिमित्त रक्तदान शिबिर, दिवाळी फराळ व किराणा साहित्य वाटप, रुग्णसेवा, अनाथ मुलांना भोजन, पशुधनासाठी चारा-पाण्याची व्यवस्था तसेच विकासकामांच्या उद्घाटनासह विविध समाजोपयोगी उपक्रम राबविण्यात आले.
ढोकी येथे भाजपा नेते प्रमोद देशमुख यांनी गोरगरीब, शेतकरी, कष्टकरी आणि दिव्यांग बांधवांसोबत वाढदिवस साजरा केला. यावेळी तब्बल १,७०० दिवाळी फराळ किटचे वाटप करण्यात आले. यावेळी गुणवंतराव देशमुख, गफार काजी, संग्राम देशमुख, सिराज मुल्ला यांच्यासह ग्रामस्थ उपस्थित होते. धाराशिव शहरात मनोगत सिनगारे, डॉ. धीरज वीर, राजाभाऊ सोनटक्के, नगरसेवक राजाभाऊ पवार, रवी मुंडे आणि प्रणित सिनगारे यांच्या वतीने पालावर राहणाऱ्या १०० भटक्या कष्टकरी कुटुंबांना किराणा साहित्याच्या दिवाळी किटचे वाटप करण्यात आले.
दगड फोडणारे, शेळीपालन आणि फळविक्री करून उदरनिर्वाह करणाऱ्या कुटुंबांना या माध्यमातून मदतीचा हात देण्यात आला. तसेच तेरणा महाविद्यालयात वाढदिवसानिमित्त रक्तदान शिबिर आयोजित करण्यात आले होते. तुळजापूर तालुक्यातील सांगवी (मार्डी) येथे भाजपा तालुका युवा मोर्चाचे अध्यक्ष दिनेश सुनील बागल व मित्रपरिवाराच्या वतीने जनावरांसाठी पाणवठ्याची व्यवस्था करण्यात आली. धारासुर मर्दानी मंदिरात आरती, तर हजरत खाजा शमशोदिन गाझी दर्गा येथे चादर अर्पण करून वाढदिवस साजरा करण्यात आला.
नळदुर्ग येथे नगराध्यक्ष बसवराज धरणे यांनी विविध उपक्रम राबविले. उपजिल्हा रुग्णालयातील रुग्णांना फळे व बिस्किटांचे वाटप, ‘आपलं घर’ प्रकल्पातील अनाथ मुलांना स्नेहभोजन आणि चिवरी येथील गोशाळेतील गायींसाठी एक ट्रॉली कडबा देण्यात आला. शहरातील विविध भागांत मुक्या जनावरांच्या पिण्याच्या पाण्यासाठी १० ते १२ सिमेंटचे हौदही बसविण्यात आले. उपनगराध्यक्ष नय्यर जहागीरदार, तानाजी जाधव, शशिकांत पुदाले, निरंजन राठोड, रीजवान काझी, राणी सुरवसे, छमाबाई राठोड, सुशांत भुमकर, सुधीर हजारे, बलदेव ठाकूर, सुनील चौधरी, प्रविण गायकवाड, धीमाजी घुगे, श्रमिक पोतदार, विनायक पुदाले, सिकंदर काझी यांच्यासह अनेक पदाधिकारी व कार्यकर्ते या उपक्रमांत सहभागी झाले. यावेळी गोशाळा चालक अकबर शेख यांचीही उपस्थिती होती.
तुळजापूर तालुक्यातील नळदुर्ग येथील चैतन्य मूकबधिर निवासी संस्थेतील विद्यार्थ्यांना प्रविण चव्हाण यांच्या वतीने मध्यान्ह भोजन देण्यात आले. यावेळी अलियाबादचे उपसरपंच अमृतराव चव्हाण, आनंद सरकार लाटे, मंदार पुदाले, धर्मराज देडे, कुणाल बेले यांच्यासह शिक्षक व मित्रपरिवार उपस्थित होता. धाराशिव शहरातही वाढदिवसाचे औचित्य साधून धाराशिव नगर पालिकेच्या माध्यमातून विविध विकासकामांना सुरुवात करण्यात आली.
प्रभाग क्रमांक १५ मधील फकीरा नगर येथील मातंग समाज मंदिर सभागृह आणि अंतर्गत रस्त्याचे, तसेच रसुलपुरा येथील जफर किराणा घर ते जुबेर पठाण घर या रस्त्याच्या कामाचे उद्घाटन नगराध्यक्ष नेहा काकडे यांच्या हस्ते करण्यात आले. यावेळी बांधकाम सभापती अभिजीत काकडे, पाणीपुरवठा सभापती विलास लोंढे, नगरसेवक राजकन्या अडसुळे गोरे, दाजीअप्पा पवार, सिद्धार्थ बनसोडे यांच्यासह दत्ता पेठे, पृथ्वीराज दलनायक, अप्पा धावारे, दादा वाघमारे, शिवाजी क्षिरसागर, अमित बनसोडे, अरुण पेठे, रॉबिन बगाडे, मिलिंद पेठे, सचिन पेठे, अजय देवकुळे आदी उपस्थित होते. वाढदिवसाच्या शुभेच्छांपेक्षा गरजूंच्या चेहऱ्यावरील आनंद महत्त्वाचा, आमदार राणाजगजितसिंह पाटील यांनी केलेल्या आवाहनाला पदाधिकारी आणि कार्यकर्त्यांनीही कृतीची जोड दिली.
दुष्काळाच्या संकटात माणसांसोबतच मुक्या जनावरांची तहान भागविण्यापासून ते गरजूंची दिवाळी गोड करण्यापर्यंत राबविण्यात आलेल्या या उपक्रमांमुळे वाढदिवसाला सामाजिक बांधिलकीची जोड मिळाली.
