धाराशिव : वाढत्या औद्योगिक क्षेत्रामुळे राष्ट्रीय आणि आंतरराष्ट्रीय कंपन्यांमध्ये मेकॅनिकल इंजिनिअर्सची मागणी दिवसेंदिवस वाढत आहे. ही बाब लक्षात घेऊन तेरणा अभियांत्रिकी महाविद्यालयाच्या मेकॅनिकल इंजिनिअरिंग विभागाने विद्यार्थ्यांसाठी प्री-प्लेसमेंट ट्रेनिंगवर विशेष भर देत नुकतीच ॲप्टिट्यूड टेस्ट आयोजित केली.
सध्या मेकॅनिकल इंजिनिअरिंगच्या विद्यार्थ्यांसाठी नोकरीच्या अनेक संधी उपलब्ध होत असून विविध नामांकित कंपन्यांकडून आकर्षक पॅकेज ऑफर केली जात आहेत. मात्र केवळ अभियांत्रिकी पदवी पुरेशी नसून विद्यार्थ्यांमधील तांत्रिक ज्ञान, समस्या सोडवण्याची क्षमता आणि कौशल्य यांची कसोटी प्लेसमेंट प्रक्रियेदरम्यान घेतली जाते.
हीच गरज ओळखून महाविद्यालयाच्या मेकॅनिकल विभागाने विद्यार्थ्यांना उद्योगविश्वासाठी तयार करण्याच्या उद्देशाने कौशल्याधारित उपक्रमांचे आयोजन केले.नामांकित कंपन्यांच्या प्लेसमेंट स्पर्धेत विद्यार्थ्यांना सक्षमपणे टिकता यावे, यासाठी ॲप्टिट्यूड टेस्ट घेऊन विद्यार्थ्यांना प्री-प्लेसमेंट ट्रेनिंग देण्यात आले. या उपक्रमाला विद्यार्थ्यांचा उत्स्फूर्त प्रतिसाद मिळाला.
या टेस्टमध्ये सहभागी झालेल्या विद्यार्थ्यांना नुकतेच प्रमाणपत्रांचे वितरण करण्यात आले. महाविद्यालयाचे प्राचार्य डॉ. व्ही. व्ही. माने, अकॅडमिक डीन तथा मेकॅनिकल विभागप्रमुख डॉ. डी. डी. दाते, प्रा. रणजीत दंडनाईक आणि प्रा. वैभव जगदाळे यांच्या हस्ते विद्यार्थ्यांचा गौरव करण्यात आला.
भरतीपूर्व प्रशिक्षणामुळे विद्यार्थ्यांमध्ये आत्मविश्वास निर्माण झाला असून आगामी प्लेसमेंट प्रक्रियेसाठी आपण अधिक सज्ज झाल्याची भावना विद्यार्थ्यांनी यावेळी व्यक्त केली.
