आमदार राणाजगजितसिंह पाटील यांच्या प्रयत्नांतून ४ कोटी ५० लाखांचा निधी मंजूर
धाराशिव – “धाराशिव शहरातील वाढता विस्तार आणि अग्निशमनसेवेची गरज लक्षात घेता, धाराशिव नगरपरिषदेला तीन नवीन अद्ययावत अग्निशमन वाहने खरेदी करण्यास शासनाने विशेष बाब म्हणून मंजुरी दिली आहे. तब्बल ४ कोटी ५० लाख १० हजार रुपयांच्या किंमत मर्यादेत होणाऱ्या या खरेदीमुळे शहराची अग्निशमन यंत्रणा अधिक सक्षम होण्यास मदत होणार आहे,” अशी माहिती आमदार राणाजगजितसिंह पाटील यांनी दिली.
दिवाळीच्या दिवसांत येडशीमध्ये दुकानाला आग लागून झालेल्या दुर्घटनेत एकाच कुटुंबातील सहा जणांचा आगीत होरपळून मृत्यू झाला होता. त्या वेळी शहराच्या अग्निशमनासंबंधी गरजांचे महत्त्व अधोरेखित झाले होते.
धाराशिव नगर परिषदेने त्याची तातडीने दखल घेऊन राज्याच्या नगर विकास खात्याकडे अग्निशमन वाहनांची मागणी करणारा प्रस्ताव पाठवला होता. या प्रस्तावाला मंजुरी मिळावी यासाठी आमदार राणाजगजितसिंह पाटील यांनी मुख्यमंत्री देवेंद्र फडणवीस यांची भेट घेऊन शहरातील अग्निशमन व्यवस्थेची सद्यस्थिती, अपुरी वाहने आणि मनुष्यबळाची कमतरता या बाबींकडे त्यांचे लक्ष वेधले होते. त्याचबरोबर उपमुख्यमंत्री व नगर विकासमंत्री एकनाथ शिंदे यांच्याकडेही पाटील यांनी सातत्याने पाठपुरावा केला होता.
आमदार पाटील यांनी केलेल्या पाठपुराव्याला यश मिळाले असून, नगर विकास खात्याने धाराशिव नगर परिषदेसाठी तीन नवीन अग्निशमन वाहनांच्या खरेदीला विशेष बाब म्हणून मंजुरी मिळाली आहे.
या निर्णयाबाबत पाटील म्हणाले, “या निर्णयाबद्दल माननीय मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांचे मनःपूर्वक आभार मानतो. आता खरेदी प्रक्रिया पूर्ण झाल्यानंतर तीन अग्निशमन वाहने धाराशिवकरांच्या सेवेत दाखल होतील. अग्निशमन विभागातील रिक्त पदे आणि मनुष्यबळाचा प्रश्नही मार्गी लागावा, यासाठी पुढील पाठपुरावा केला जाईल.”




