नळदुर्ग शहराच्या विकासावर चर्चा
ग्रामविकासाच्या अनुभवातून पेरे पाटील यांचे मार्गदर्शन
नळदुर्ग : महाराष्ट्रातील ग्रामविकासाचा आदर्श निर्माण करणारे आणि आपल्या कार्यातून राज्यभर नावलौकिक मिळवलेले आदर्श सरपंच भास्करराव पेरे पाटील यांनी नळदुर्ग नगरपरिषदेचे नगराध्यक्ष बसवराज आप्पा धरणे यांच्या कार्यालयाला सदिच्छा भेट दिली. यावेळी नगराध्यक्ष धरणे यांच्या हस्ते पेरे पाटील यांचा सन्मानपूर्वक सत्कार करण्यात आला.
या भेटीदरम्यान नळदुर्ग शहराच्या सर्वांगीण विकासासंदर्भात सविस्तर चर्चा करण्यात आली. विशेषतः दुष्काळी परिस्थितीवर मात करण्यासाठी पाणीपुरवठ्याचे योग्य नियोजन, जलस्रोतांचे संवर्धन, स्वच्छता, आरोग्य सुविधा, रस्ते तसेच नागरी सुविधांचा विस्तार अशा विविध महत्त्वपूर्ण विषयांवर विचारविनिमय करण्यात आला.
भास्करराव पेरे पाटील यांनी ग्रामविकासाच्या क्षेत्रात केलेले उल्लेखनीय कार्य आणि त्यांचा प्रदीर्घ अनुभव नळदुर्ग शहराच्या विकासासाठी निश्चितच मार्गदर्शक ठरेल, असा विश्वास नगराध्यक्ष बसवराज आप्पा धरणे यांनी व्यक्त केला.
स्वच्छ, सुंदर, समृद्ध आणि विकसित नळदुर्ग घडविण्यासाठी पेरे पाटील यांच्या अनुभवाचा आणि मार्गदर्शनाचा उपयोग करून शहराच्या विकासाला नवी दिशा देण्याचा संकल्प यावेळी व्यक्त करण्यात आला. याप्रसंगी नळदुर्गच्या सर्वांगीण प्रगतीसाठी विकासाभिमुख दृष्टिकोनातून काम करण्याचा निर्धार करण्यात आला.


