२०० विद्यार्थ्यांचा व्यसनमुक्तीचा जागर
तालुका पोलिसांच्या ‘एकता दौड’ला उत्स्फूर्त प्रतिसाद
बार्शी : राष्ट्रीय एकता, सामाजिक सलोखा आणि व्यसनमुक्तीचा संदेश देत बार्शीत पोलीस अधिकारी, कर्मचारी आणि २०० विद्यार्थ्यांनी ‘एकता दौड’मध्ये उत्स्फूर्त सहभाग घेतला. भारताचे पहिले गृहमंत्री लोहपुरुष सरदार वल्लभभाई पटेल यांच्या जयंतीनिमित्त बार्शी तालुका पोलीस ठाण्याच्या वतीने या दौडचे व अमली पदार्थविरोधी जनजागृती अभियानाचे आयोजन करण्यात आले होते.
उपविभागीय पोलीस अधिकारी सुहास जगताप यांच्या प्रमुख उपस्थितीत आणि बार्शी तालुका पोलीस ठाण्याचे प्रभारी अधिकारी, सहायक पोलीस निरीक्षक अक्षय सोनवणे यांच्या नेतृत्वाखाली हा उपक्रम पार पडला. उदय शिंदे यांच्या श्री करिअर अकॅडमी आणि अश्रफ सर यांच्या स्प्रिंट किंग अकॅडमीतील एकूण २०० तरुण विद्यार्थी या दौडेमध्ये सहभागी झाले होते.
बार्शी तालुका पोलीस ठाण्यापासून सुरू झालेली दौड उपळाई रोडमार्गे बार्शी चौकापर्यंत गेली. तेथून माघारी फिरून पोलीस ठाण्यात दौडेचा समारोप झाला. मार्गावर सहभागींनी राष्ट्रीय एकता आणि अमली पदार्थविरोधी घोषणा देत नागरिकांचे लक्ष वेधले.
या वेळी सुहास जगताप आणि अक्षय सोनवणे यांनी विद्यार्थ्यांना मार्गदर्शन केले. अमली पदार्थांच्या सेवनामुळे शारीरिक व मानसिक आरोग्यावर होणारे दुष्परिणाम, कुटुंबाची होणारी हानी आणि समाजावर पडणारा विपरित प्रभाव या बाबत त्यांनी माहिती दिली. युवकांनी व्यसनांपासून दूर राहून शिक्षण, क्रीडा आणि विधायक उपक्रमांना प्राधान्य द्यावे, असे आवाहन त्यांनी केले.
सरदार वल्लभभाई पटेल यांच्या देशाच्या एकीकरणातील योगदानाचेही या वेळी स्मरण करण्यात आले. देशाची एकता आणि अखंडता जपणे ही प्रत्येक नागरिकाची जबाबदारी असून, सामाजिक सलोखा राखण्यासाठी युवकांनी पुढाकार घ्यावा, असा संदेश देण्यात आला. पोलीस आणि प्रशिक्षण अकॅडमींच्या संयुक्त सहभागातून राबवलेल्या या उपक्रमात शारीरिक तंदुरुस्ती, सामाजिक जबाबदारी आणि व्यसनमुक्त जीवनशैलीचे महत्त्व अधोरेखित करण्यात आले.
