महायुतीच्या विजयासाठी एकजुटीने काम करा
आमदार राणाजगजितसिंह पाटील यांचे कार्यकर्त्यांना आवाहन
धाराशिव : ‘महायुतीतील सर्व घटक पक्षांनी एकत्रितपणे आणि ताकदीने निवडणुकीला सामोरे जात, विजयाचे उद्दिष्ट साध्य करण्यासाठी प्रत्येकाने आपली जबाबदारी प्रभावीपणे पार पाडणे गरजेचे आहे. पदवीधर निवडणुकीतील महायुतीचे उमेदवार सतीश चव्हाण हे डॉक्टर पद्मसिंह पाटील साहेबांचे कार्यकर्ते आहेत. त्यांना धाराशिवमधून अधिक बळ देऊ या,’ असे आवाहन आमदार राणाजगजितसिंह पाटील यांनी केले.
मराठवाडा पदवीधर मतदारसंघाच्या निवडणुकीच्या पार्श्वभूमीवर शुक्रवारी धाराशिव शहरातील पुष्पक मंगल कार्यालयात महायुतीची संवाद सभा पार पडली. त्यावेळी आ. राणाजगजितसिंह पाटील बोलत होते. राष्ट्रवादी काँग्रेसचे प्रदेशाध्यक्ष खासदार सुनील तटकरे या सभेच्या अध्यक्षस्थानी होते.
आमदार राणाजगजितसिंह पाटील म्हणाले, ‘मुख्यमंत्री देवेंद्र फडणवीस यांच्या नेतृत्वाखाली आपल्या धाराशिव जिल्ह्यासह संपूर्ण मराठवाड्यात विकासाची अनेक कामे मार्गी लागत आहेत. कोल्हापूर-सांगली भागातून धाराशिवमध्ये पाणी आणण्याचा महत्त्वाकांक्षी प्रयत्न, धाराशिव मध्ये साडेतीन किमी मार्गाचे विमानतळ विकास आणि जिल्ह्यात मोठे उद्योग आणण्याच्या दृष्टीने सुरू असलेले प्रयत्न यांमधून विकासाच्या नव्या संधी निर्माण करण्यावर भर दिला जात आहे.’
‘आपल्या धाराशिवच्या विकासाला गती देण्यासाठी सत्ताधारी पक्षाचा लोकप्रतिनिधी असण्याचे वेगळे महत्त्व आहे. त्यामुळे पदवीधर मतदारसंघातही युतीचाच आमदार असायला हवा. सतीश चव्हाण यांच्या विजयासाठी सर्व कार्यकर्त्यांनी एकजुटीने काम करायला हवे. तसेच मतदानादिवशी प्रत्येक मतदाराला मतदानासाठी प्रोत्साहित करून एकही मत वाया जाणार नाही, यासाठी प्रयत्न करावेत,’ असे आवाहन पाटील यांनी केले.
खासदार सुनील तटकरे यांनी देखील आमदार सतीश चव्हाण यांच्या विजयाचा विश्वास यावेळी व्यक्त केला. येत्या २३ ऑक्टोबरला मराठवाडा पदवीधर मतदारसंघाच्या निवडणुकीसाठी मतदान पार पडणार आहे.
यावेळी सहकारमंत्री बाबासाहेब पाटील, आमदार बसवराज पाटील, आ. विक्रम काळे, माजी आमदार राहुल मोटे, जिल्हा परिषद अध्यक्षा अर्चनाताई पाटील, भाजपा जिल्हाध्यक्ष दत्ताभाऊ कुलकर्णी, सुरेश बिराजदार, भाऊसाहेब खरसडे यांच्यासह महायुतीचे पदाधिकारी व कार्यकर्ते मोठ्या संख्येने उपस्थित होते.
