आपत्कालीन परिस्थितीत भाविकांना तातडीने मदत देण्याची तयारी
तुळजापूर : महाराष्ट्राची कुलस्वामिनी आई श्री तुळजाभवानी देवींच्या शारदीय नवरात्र महोत्सवाला ११ ऑक्टोबरपासून प्रारंभ होत आहे. या काळात तुळजापूरमध्ये होणारी भाविकांची मोठी गर्दी लक्षात घेऊन मंदिर संस्थानने आपत्कालीन आरोग्य व्यवस्थेच्या दृष्टीने महत्त्वाचे पाऊल उचलले आहे. श्री तुळजाभवानी मंदिर संस्थानच्या सुरक्षा रक्षक आणि स्वच्छता कर्मचाऱ्यांना प्रथमोपचारासह CPR (Cardiopulmonary Resuscitation) देण्याचे विशेष प्रशिक्षण देण्यात आले.
मंदिर संस्थानच्या प्रशासकीय कार्यालयातील तळमजल्यावर आयोजित प्रशिक्षणात एखादी व्यक्ती अचानक बेशुद्ध पडल्यास तिची प्राथमिक तपासणी कशी करावी, श्वासोच्छवास बंद झाल्यास CPR कशा पद्धतीने द्यावा तसेच आपत्कालीन परिस्थितीत तातडीने कोणती कार्यवाही करावी, याबाबत प्रत्यक्ष प्रात्यक्षिकासह मार्गदर्शन करण्यात आले.
Basic Life Support (मूलभूत जीवन आधार) अंतर्गत हे प्रशिक्षण डॉ. श्रीराम नरवडे आणि डॉ. विकास क्षीरसागर यांच्या मार्गदर्शनाखाली पार पडले. आपत्कालीन प्रसंगी रुग्णाला वैद्यकीय मदत मिळेपर्यंत प्राथमिक स्तरावर योग्य उपचार मिळणे महत्त्वाचे असल्याने कर्मचाऱ्यांना त्यासंबंधी आवश्यक माहिती देण्यात आली.
शारदीय नवरात्र महोत्सवात राज्यासह विविध भागांतून मोठ्या संख्येने भाविक तुळजापूरमध्ये दाखल होतात. गर्दीच्या ठिकाणी एखाद्या भाविकाची प्रकृती अचानक बिघडल्यास किंवा अन्य आपत्कालीन परिस्थिती उद्भवल्यास तातडीने प्राथमिक मदत उपलब्ध व्हावी, या उद्देशाने सुरक्षा आणि स्वच्छता कर्मचाऱ्यांना हे प्रशिक्षण देण्यात आले.
यावेळी सुरक्षा निरीक्षक विक्रम कदम, ऋषिकेश पराडे, सहायक सुरक्षा निरीक्षक श्रीकांत पवार, ओम खुरुद, स्वच्छता निरीक्षक दयानंद जोगदंड, सुरक्षा पर्यवेक्षक अक्षय घुगे, अनिल लोखंडे, आनंद पाटील, राजेंद्र नरवडे, स्वप्नील इंडोरी यांच्यासह मंदिर संस्थानचे कर्मचारी उपस्थित होते.
