धाराशिव : घरात आर्थिक परिस्थिती बेताची असतानाही वडिलांच्या स्वप्नांना आकार देणारे सुपुत्र म्हणजे राम गरड. शेतमजुरी करून आपल्या मुलाला अभियांत्रिकीचे शिक्षण द्यावे, हे वडिलांचे स्वप्न साकार करण्यासाठी त्यांनी तेरणा अभियांत्रिकी महाविद्यालयातील मेकॅनिकल विभागाची निवड केली. या निवडीनेच त्यांच्या आयुष्याला कलाटणी दिली.
महाविद्यालयात शिक्षण घेत असतानाच त्यांना विविध स्पर्धा परीक्षांचे उत्तम मार्गदर्शन मिळाले. महाविद्यालयाने उपलब्ध करून दिलेल्या सुविधा आणि प्रोत्साहनामुळेच आपण एमपीएससी स्पर्धा परीक्षेच्या पोलीस उपनिरीक्षक पदाच्या परीक्षेत यश मिळवू शकल्याचे राम यांनी सांगितले. अभियांत्रिकी शिक्षणासोबतच महाविद्यालयाने घेतलेले वारंवार होणाऱ्या ॲप्टिट्यूड टेस्ट आणि विभागीय प्राध्यापकांनी दिलेले तांत्रिक ज्ञान यामुळे आपले यश निश्चित झाल्याचे ते म्हणाले.
या उल्लेखनीय यशाबद्दल महाविद्यालयाच्या वतीने राम गरड यांचा शाल व श्रीफळ देऊन गौरव करण्यात आला. याप्रसंगी प्राचार्य डॉ. व्ही. व्ही. माने यांनी महाविद्यालयाच्या विद्यार्थी-केंद्रित दृष्टिकोनावर प्रकाश टाकला.
यावेळी बोलताना प्राचार्य डॉ. व्ही. व्ही. माने म्हणाले, “विद्यार्थ्यांच्या सर्वांगीण विकासासाठी तेरणा महाविद्यालय नेहमीच प्रयत्नशील आहे. मित्रचे उपाध्यक्ष संस्थेचे विश्वस्त मा. आमदार राणाजगजितसिंह पाटील यांनी दहा वर्षांपूर्वी सुरू केलेले ‘तेरणा स्पर्धा परीक्षा अध्ययन केंद्र’ हा याच दिशेने टाकलेले महत्त्वपूर्ण पाऊल आहे. या केंद्रामुळे विद्यार्थ्यांना वर्ग-१ अधिकारी होण्यासाठी मार्गदर्शन मिळत आहे. या उपक्रमाचेच फलित म्हणून महाविद्यालयाचे अनेक विद्यार्थी आज उपजिल्हाधिकारी, तहसीलदार, कार्यकारी अधिकारी, पोलीस उपनिरीक्षक, कमांडर, सहाय्यक अभियंता यांसारख्या उच्चपदांवर कार्यरत आहेत. तसेच देश-विदेशातील अनेक नामांकित कंपन्यांमध्ये तेरणाचे विद्यार्थी चमकदार कामगिरी बजावत आहेत व त्याचबरोबर रामच्या यशाने एक नवीन दिशा दाखवली आहे की, तांत्रिक शिक्षणासोबत योग्य मार्गदर्शन मिळाले तर विद्यार्थी प्रशासकीय सेवेतही आपलं स्थान निर्माण करू शकतात.”
राम यांनी यावेळी आपल्या यशाचे श्रेय मेकॅनिकल विभागातील प्रा. आर. एम. शेख यांच्या विशेष मार्गदर्शनाला दिले.
