महाराष्ट्रामध्ये गेल्या काही दिवसांपासून सुरू असलेल्या पावसामुळे जनजीवन विस्कळीत झाले आहे. भारतीय हवामान विभागाने (IMD) राज्यात पुढील 24 तासांसाठी अतिवृष्टीचा इशारा दिला असून, अनेक जिल्ह्यांसाठी रेड, ऑरेंज आणि यलो अलर्ट जारी केला आहे. विशेषतः कोकण, मध्य महाराष्ट्र, मराठवाडा आणि विदर्भामध्ये जोरदार पावसाची शक्यता आहे. (Maharashtra Rain Updates)
जिल्हानिहाय हवामानाचा अंदाज
- कोकण: रायगड जिल्ह्यासाठी रेड अलर्ट (Red Alert) जारी करण्यात आला आहे. मुंबई, ठाणे, पालघर आणि रत्नागिरी जिल्ह्यांसाठी ऑरेंज अलर्ट (Orange Alert) आहे, तर सिंधुदुर्ग जिल्ह्यासाठी यलो अलर्ट (Yellow Alert) देण्यात आला आहे.
- पश्चिम महाराष्ट्र: पुणे, कोल्हापूर, सातारा, सांगली आणि सोलापूर जिल्ह्यांमध्ये मध्यम स्वरूपाच्या पावसाची शक्यता आहे. मात्र, पुणे, कोल्हापूर आणि सातारा जिल्ह्यातील घाट (Ghat) परिसरांसाठी अनुक्रमे रेड आणि ऑरेंज अलर्ट जारी करण्यात आला आहे.
- मराठवाडा: छत्रपती संभाजीनगर, जालना, परभणी आणि बीडमध्ये हलका ते मध्यम पाऊस पडण्याची शक्यता आहे. हिंगोली, नांदेड, लातूर आणि धाराशिवमध्येही पावसाचा अंदाज आहे.
- उत्तर महाराष्ट्र: नाशिक आणि धुळे जिल्ह्यांसाठी यलो अलर्ट देण्यात आला आहे. नंदुरबार आणि नाशिकच्या घाट क्षेत्रांसाठी ऑरेंज अलर्ट जारी करण्यात आला आहे, तर जळगाव आणि अहिल्यानगरमध्ये मध्यम पाऊस अपेक्षित आहे.
- विदर्भ: नागपूर, अकोला, अमरावती, भंडारा, बुलढाणा, चंद्रपूर, गडचिरोली, गोंदिया, वर्धा, वाशिम आणि यवतमाळ जिल्ह्यांसाठी यलो अलर्ट आहे. या भागांमध्ये विजांच्या कडकडाटासह वादळी वाऱ्याची शक्यताही वर्तवण्यात आली आहे.
गेल्या आठवड्यात झालेल्या पावसामुळे राज्यातील अनेक भागांत शेतीचे मोठे नुकसान झाले आहे. सततच्या आणि अनिश्चित पावसामुळे शेतकरी चिंतेत आहेत. हवामान विभागाने नागरिकांना, विशेषतः शेतकऱ्यांना, सावध राहण्याचे आणि आवश्यक ती खबरदारी घेण्याचे आवाहन केले आहे.
